Chirurgia de sa buca.
In sa chirurgia de sa buca si bogant is dentis e tessutus chi funt càusa de unfraduras, infetzionis o maladias oncològicas.
Alfadental fait:
• Disrexinamentus (tiraduras) de dentis simplis opuru traballosus:
• Cunsideradas sa “extrema ratio”, funt comuncas unu tratamentu a pretzisu po nexi de tacaduras chi arrovinant totu, a truncamentus, a problemas parodontalis avantzaus meda, po nexi de disodontiasi est a nai a dentis bessias cun d-una posidura sballiada chi fait dannus a àteras dentis (is dentis de s’ogu funt is prus bogadas po custa arraxoni).
• Germectomias:
Gràtzas a is arradiugrafias, fait a scoberri is problemas de is dentis in su momentu de sa formadura e duncas in d-una situatzioni de dentis chi no funt tambeni bessias. Custus problemas podint fai lompi a pigai sa detzidura de prevennidura de ndi bogai sa denti chi est cumentzendi a nasci aìnturu de s’ossu e chi est cumentzendi a s’adelantai. Custu tratamentu pertocat casi sèmpiri sa denti de s’ogu.
• Frenulectomias:
Is filetus funt filus chi acàpiant sa lìngua e is murrus a masudda e cantèrgiu ca arregulant is movimentus. Custus filetus funt generalmenti de “longària giusta” est a nai ca no ponint barrancu perunu in su movimentu de sa fueddada/matziadura/arrisu. A bortas custus filetus funt meda curtzus e calincuna borta podint essi sa càusa de barrancus fonèticus e de movimentu, podint essi s’arraxoni de s’arretradura de su màrgini de is sìntzias po su fatu de tirai tropu asuba de is mucosas; in custa situatzioni si fait sa frenulectomia, est a nai ca ndi bogaus su filetu.
• Apicectomias/endodontzias chirùrgicas:
Is infetzionis-unfraduras de su cùcuru de sa denti, po nexi de tacadura avantzada o fertas benint tratadas cun su “disabiatzamentu”. A bortas s’infetzioni nàscia arresistit a-i custu tratamentu e tocat a fai s’apicectomia, est a nai de unu tratamentu chi permitit de ndi bogai de manera chirùrgica sa punta de s’arrèxini giai cumpromìtia po arresolvi s’infetzioni e sarbai sa denti.
• Bogaduras de neoplasias benìnnias, malìnnias, dentalis opuru no dentalis:
Sa buca, aici comenti is àteras partis de s’organismu, no est esclùdia de su perìgulu de formadura de tumoris in is tessutus. Custas neoplasias podint e depint essi scobertas e bogadas luegus. Sa majoria de is neoplasias adelantadas in buca funt benìnnias aici comenti a is guronis: est perou de importu mannu a intendi a unu spetzialista po cumprendi comenti funt nàscius e is tratamentus de fai. Is tènnicas de scoberta e bogadura funt in evolutzioni, e permitint sèmpiri de amparai su tessutu sanu de sa buca.
• Bogaduras de lùpias:
Aìnturu de sa buca, a cumentzai medas bortas de problemas piticus no scobertus (comenti granulomas opuru arrogus de arrèxini apustis de ddas ai bogadas), si podint adelantai lùpias. Is lùpias benint bias cun arradiugrafias o clinicamenti, pruschetotu candu custas sumint lìcuidu sangiosu (sàngia) in buca. Candu ddas bieus insaras custas andant bogadas luegus.
• Scialolitiasi:
Is gràndulas de sa buca de prus importu chi produsint salia ndi produsint una cantidadi de fundamentu po su funtzionamentu normali de is mecanismus de sa buca po sa matziadura e po concòiri, po s’amparu de sa buca de sa tacadura e fonètica. Po arraxonis chi funt tambeni in d-unu momentu de stùdiu, is canalis de custas gràndulas podint essi serraus. Po custa arraxoni si podit formau una pedra, simbillanti a sa pedra de un’arrigu, in is canalis de sa salia. No sèmpiri custu benit tratau chirurgicamenti, ma chi no si arrennescit a drenai iat a depi essi bogau.
Chirurgia de is tessutus moddis de sa buca
Sa chirurgia de is tessutus moddis de sa buca pertocat is sìntzias e is filetus.
Is sìntzias podint tenni abisòngiu de chirurgia de is tessutus moddis de sa buca candu sa posidura insoru no est giusta, e est a nai po su chi pertocat su puntu de partzidura intre corona de sa denti e arrèxini de sa denti. Si interbenit candu:
• furriadura de is sìntzias: candu su màrgini de is sìntzias est furriau in cumparàntzia a sa corona de sa denti (a su biancu de sa denti) po nexi de limpiadura e tratamentus ortodònticus, fait a interbenni cun d-unu tratamentu pagu-invasivu, chena de dolori e chi benit fatu in d-una sètzida scéti, po torrai su màrgini de is sìntzias a s’arrasu suu; Ghetadura passiva a trastocada: candu su livellu de su màrgini de is sìntzias arreprenit parti de sa corona de sa denti faendi una “buciaca” intre is sìntzias imprus e sa corona (aundi nci funt batèrius e unfrant is sìntzias) e produsendi unu problema estèticu, fait a intervenni cun d-unu tratamentu pagu invasivu, chena de dolori e in d-una sètzida scéti, po torrai su màrgini de is sìntzias a s’arrasu giustu.
In su stùdiu Alfadental sa Dotora Alessandra Pinna, cun 18 annus de sperièntzia, fait chirurgia de is tessutus moddis de sa buca, aguantendi su livellu de is sìntzias firmu in su tempus.